Previa | Adversario necesitado para o Xuvenil A
Pabellón CF - AJ Lérez (Miguel Ángel-Os Remedios; domingo 16, 12:00 horas):
O conxunto branquiverde recibe este domingo ao AJ Lérez na undécima xornada da Liga Nacional Xuvenil, nun encontro no que os ourensáns buscarán sumar tres novos puntos que lles permitan seguir avanzando cara ao obxectivo da permanencia.
O conxunto pontevedrés chega a Ourense situado na penúltima posición da táboa con 7 puntos, todos eles acadados como local, xa que como visitante conta os seus cinco desprazamentos por derrotas, cun balance de 2 goles a favor e 29 en contra. Estes números, con todo, non deben levar a exceso de confianza, pois o equipo pontevedrés tratará de romper esa dinámica negativa.
O Pabellón, oitavo con 14 puntos, afronta a cita coa intención de impoñer o seu xogo e manter a concentración durante os noventa minutos para sacar adiante un partido clave nesta fase da competición. Actualmente a categoría contempla cinco descensos, dous de forma directa e outros tres condicionados polos arrastres da División de Honra, que nesta tempada conta con nove equipos galegos entre os dezaseis participantes, polo que cada punto pode resultar determinante ao final da campaña.
O adestrador pabellonista Rubén García non poderá contar con Álex Riveiro, Maikel, Gómez, Samuel Villar, Iker Regueira e Samuel Ferraz. Con respecto á semana pasada soamente recupera a Mancebo.
Álvaro Cid Rodríguez, asistido nas bandas por Cerreda Ferrón e Pérez Ochandategui, do Colexio de Ourense, serán os encargados da arbitraxe. Pinchando no seguinte enlace pódense ver os partidos e horarios correspondentes á XORNADA 11.
