0-1 | O Sénior sae airoso do Outeiro do Miogo

O Sénior regresou do Outeiro do Miogo cos tres puntos tras impoñerse por 0-1 ao Taboadela nun encontro moi disputado e marcado polas constantes interrupcións que correspondía a xornada dezanove da Segunda Futgal.

A primeira metade estivo moi trabada, con moito xogo de contacto e pouco ritmo, condicionada polas lesións de dous xogadores do conxunto local, que tiveron que ser substituídos antes do descanso. Nese contexto, o Pabellón amosouse lixeiramente superior en canto a ocasións.

A primeira aproximación clara, porén, foi para o Taboadela aos cinco minutos, cun remate de Jonay, un dos futbolistas que posteriormente tería que abandonar o terreo de xogo por lesión. Pouco despois respondeu o cadro visitante cun disparo afastado de Aldán que estivo a piques de sorprender a Miguel, gardameta local. O propio Miguel tería que empregarse a fondo para desbaratar dous remates perigosos do equipo branquiverde antes do intermedio.

Tras o paso polos vestiarios mantívose a loita por cada balón, pero o Pabellón deu un paso adiante a nivel defensivo e logrou pisar con máis frecuencia a área rival. O conxunto dirixido por Toño Sanmartín mostrouse máis sólido e decidido, e esa melloría acabaría tendo premio. Nunha das chegadas visitantes, un pase filtrado de Moure atopou a Jhonny Nóvoa, que apenas levaba oito minutos sobre o céspede, e o atacante definiu con acerto para facer o 0-1.

Co marcador a favor, o Pabellón soubo controlar o tramo final do encontro, evitando ocasións claras do Taboadela e mantendo a súa vantaxe ata o asubío final. Un triunfo que permite aos branquiverdes alcanzar os 31 puntos na clasificación.

Na vindeira xornada, o Pabellón CF recibirá no campo Miguel Ángel ao Rayo 21, líder invicto do grupo, nun duelo de máxima esixencia.