Xornada complementaria na Escola de Iniciación

Os nenos e nenas da Escola de Iniciación nados nos anos 2020 e 2021 participaron este venres nunha actividade extra no Pabellón da Policía Nacional, nunha xornada pensada para seguir medrando a través do xogo.

A sesión desenvolveuse en formato de partidos divididos en varios tempos, adaptados á súa idade, permitindo que todos os participantes gozasen de minutos e experiencias sobre a pista.

Máis alá do resultado, o obxectivo foi fomentar o compañeirismo, a coordinación e o primeiro contacto coa dinámica competitiva dun xeito lúdico e formativo.

A actividade converteuse tamén nunha auténtica xornada de convivencia, xa que os pequenos estiveron arroupados polos seus familiares desde as bancadas, creando un ambiente festivo e cheo de ilusión.

A Escola conta con dous grupos que traballan en días diferentes nas instalacións de Os Remedios, o que permite adaptar o proceso formativo ás necesidades de cada idade.

Desde o club destácase que ao longo da tempada organízanse este tipo de encontros complementarios, nalgúns casos tamén en colaboración con outras Escolas da provincia, co propósito de enriquecer a experiencia deportiva dos máis pequenos e fortalecer os lazos entre entidades.

Un paso máis no camiño formativo dun proxecto que aposta por aprender xogando desde as primeiras etapas.

¡Sumando experiencias!