0-1 | O Sénior caeu co líder dando batalla

O Sénior caeu pola mínima (0-1) ante o Rayo 21 na 20ª xornada da Segunda Futgal, nun encontro no que os de Toño Sanmartín plantaron batalla ao líder invicto, pero no que un gol madrugador acabou marcando a diferenza.

O tanto visitante chegou apenas aos cinco minutos de xogo, nun inicio que obrigou aos locais a remar a contracorrente desde moi cedo. Co paso dos minutos, o cadro pabellonista asentouse sobre o terreo de xogo e buscou a igualada con insistencia.

A acción máis protestada da primeira metade foi un posible penalti sobre Numan, moi reclamado pola bancada, que o colexiado decidiu non sinalar. Esta fase do partido consumiuse sen grandes ocasións en ningunha das dúas áreas.

Na segunda metade, o Pabellón deu un paso adiante e tentou someter ao líder, que amosou por que encabeza a clasificación defendéndose con orde e oficio. Un remate de Sergio e outro de Numan estiveron moi preto de supoñer o empate, pero a falta de acerto e a solidez visitante impediron a igualada.

Nos compases finais chegou a nota negativa da tarde: a lesión de Miguel Ángel, que acababa de entrar no terreo de xogo e tivo que ser trasladado a un centro médico por un problema nun xeonllo. Un desenlace agridoce para un Pabellón competitivo que puxo en dificultades ao líder, pero que quedou sen premio.

Con este resultado adverso o equipo queda con 31 puntos e na próxima xornada visita ao Piñeira Seca, cuarto clasificado con 38 puntos.

FICHA TÉCNICA