6-0 | Vitoria cómoda do Sénior

O Sénior asinou unha contundente vitoria fronte ao Cenlle na 22ª xornada da Segunda Futgal, nun encontro no que os locais foron claramente superiores ao longo dos noventa minutos.

Dende o asubío inicial, o conxunto dirixido por Toño Sanmartín levou o peso do partido, dominando a posesión e xerando constantes achegamentos á área visitante. A resistencia do Cenlle mantívose ata o tramo final do primeiro tempo, pero no derradeiro cuarto de hora os blanquiverdes deron un golpe case definitivo ao encontro.

Raúl abriu o marcador, poñendo xustiza ao que se estaba vendo sobre o terreo de xogo. Pouco despois, Aldán ampliou a vantaxe e, xa nos últimos compases antes do descanso, Numan estableceu o 3-0, deixando o partido moi encarrilado para os locais ao intermedio.

Lonxe de baixar o ritmo, o Pabellón continuou mandando na segunda metade. Co control absoluto do xogo e sen apenas concesións en defensa, os ourensáns seguiron atopando espazos ante un rival superado. Froito dese dominio chegarían tres novos tantos que redondearon a goleada: Moure fixo o cuarto, Óscar sumou o quinto e Sergio pechou a conta co definitivo 6-0.

Un triunfo que confirma o bo momento dos branquiverdes e que lles permite alcanzar os 34 puntos na táboa, reforzando as súas aspiracións nesta recta decisiva do campionato.

Agora, o calendario presenta un novo reto para os de Toño Sanmartín, que afrontarán dúas saídas consecutivas para enfrontrarse a Toén e Viana.

FICHA TÉCNICA