1-1 | O Senior cede dous puntos nos minutos finais
DOMINGO 21/12/2025 (16:15) Campo: O TESO (100)
CD CALDELAO INTER RIBEIRA SACRA: 1 – PABELLÓN CF: 1 (0-0)
O equipo Senior pechou o ano competitivo cun empate fronte ao CD Caldelao, colista da categoría, nun encontro correspondente á 16ª xornada da Segunda Futgal que deixou sensacións encontradas polo visto sobre o terreo de xogo.
O conxunto branquiverde foi claramente superior durante o primeiro tempo, no que dispuxo de tres ocasións claras para marchar ao descanso con vantaxe. A máis evidente chegou nunha falta directa lanzada por Noli que se estrelou no largueiro; o rexeite caeu a Raúl, pero o seu disparo volveu atoparse coa madeira.
O propio Raúl tivo outra gran opción cunha vaselina que se marchou lixeiramente alta, mentres que a última oportunidade da primeira metade chegou nun saque de esquina que Luis prolongou no primeiro pau, sen que Jhonny Merlo chegase por moi pouco no segundo.
Tras o paso polos vestiarios, o Pabellón atopou por fin o premio ao seu dominio. Unha boa asistencia de Moure permitiu a Jhonny Novoa, recentemente incorporado ao encontro, adiantar aos visitantes e facer xustiza ao traballo realizado ata ese momento.
Co marcador en contra, o Caldelao deu un paso adiante e buscou o empate con máis corazón que fútbol. Nunha contra, os locais provocaron a expulsión de Aldán, circunstancia que cambiou o guión do tramo final.
En superioridade numérica, o equipo local volcouse en ataque e, cando xa se entraba nos últimos compases, conseguiu o empate a falta de tres minutos, aproveitando un despiste defensivo.
O empate permite ao Pabellón elevar a súa conta a 25 puntos antes do parón de Nadal. A competición regresará a comezos de xaneiro cun reto ilusionante: a eliminatoria de dezaseisavos de final da Copa Deputación, que se disputará no Miguel Ángel fronte ao Antela da Preferente Futgal os días 3 ou 4 de xaneiro.
FICHA TÉCNICA
CD Caldelao: Brais, Alejandro, Víctor, Andrés, Hugo, Daniel (Rubén, m.66), Iker, Diego (Yondivert, m.31), Saa, Samuel e Jefer.
Pabellón CF: Nacho, Rober, Luis, Miguel Ángel, Mario, Sergio, Jhonny Merlo, Aldán, Noli (Pede, m.68), Raúl (Jhonny Nóvoa, m.58) e Moure.
Árbitro: Gabriel Márquez Pérez (Comité Galego-Ourense). Amonestou a Alejandro (m.66) nos locais e nos visitantes a Pede (m.78), Jhonny Nóvoa (m.80). Tamén expulsou a Aldán con vermella directa (m.85).
Goles: 0-1, m.61: Jhonny Nóvoa. 1-1, m.87: Andrés.